wafa karna hamein khalta raha hai

vafā karnā hameñ khaltā rahā hai

mohabbat meñ ye dil jaltā rahā hai

ġhamoñ kī āñdhiyāñ sahte rahe haiñ

jafā kā silsila chaltā rahā hai

ḳhatā karnā hameñ manzūr kab thā

ḳhatā-varoñ ko ye khaltā rahā hai

nikal aa.e har ik janjāl se ham

zamāna haath ko maltā rahā hai

huī jis par buzurgoñ kī 'ināyat

haqīqī raah par chaltā rahā hai

ghaTā kar sāñseñ detā hai nayā din

samay har shaḳhs ko chhaltā rahā hai

tarāsho zehn ko din raat apne

badan kā husn to Dhaltā rahā hai

use paane kī koshish meñ lage haiñ

jigar meñ ḳhvāb jo paltā rahā hai

wafa karna hamein khalta raha hai

mohabbat mein ye dil jalta raha hai

ghamon ki aandhiyan sahte rahe hain

jafa ka silsila chalta raha hai

KHata karna hamein manzur kab tha

KHata-waron ko ye khalta raha hai

nikal aae har ek janjal se hum

zamana hath ko malta raha hai

hui jis par buzurgon ki 'inayat

haqiqi rah par chalta raha hai

ghaTa kar sansen deta hai naya din

samay har shaKHs ko chhalta raha hai

tarasho zehn ko din raat apne

badan ka husn to Dhalta raha hai

use pane ki koshish mein lage hain

jigar mein KHwab jo palta raha hai