وفا کرنا ہمیں کھلتا رہا ہے

وفا کرنا ہمیں کھلتا رہا ہے

محبت میں یہ دل جلتا رہا ہے

غموں کی آندھیاں سہتے رہے ہیں

جفا کا سلسلہ چلتا رہا ہے

خطا کرنا ہمیں منظور کب تھا

خطا واروں کو یہ کھلتا رہا ہے

نکل آئے ہر اک جنجال سے ہم

زمانہ ہاتھ کو ملتا رہا ہے

ہوئی جس پر بزرگوں کی عنایت

حقیقی راہ پر چلتا رہا ہے

گھٹا کر سانسیں دیتا ہے نیا دن

سمے ہر شخص کو چھلتا رہا ہے

تراشو ذہن کو دن رات اپنے

بدن کا حسن تو ڈھلتا رہا ہے

اسے پانے کی کوشش میں لگے ہیں

جگر میں خواب جو پلتا رہا ہے