wafa karne aae jafa kar chale

vafā karne aa.e jafā kar chale

hameñ ḳhaak meñ vo milā kar chale

ye kyā tum ko sūjhī ye kyā kar chale

ki chitvan se bismil banā kar chale

mujhe qatl teġh-e-jafā kar chale

ye kyā kar chale tum ye kyā kar chale

milā.ī kabhī tum ne jis se nigāh

use apnā shaidā banā kar chale

tirī raah meñ misl-e-naqsh-e-qadam

ham apne ko kyā kyā miTā kar chale

idhar aao baiTho bhī āġhosh meñ

kahāñ mujh se āñkheñ churā kar chale

tumheñ paas agar baiThnā hī na thā

to kyoñ ham se tum dil lagā kar chale

zabāñ par na laanā thā harf-e-gila

tirī bazm se muñh kī khā kar chale

azal kā tumheñ qaul hai yaad bhī

ki aa.e the kyā kah ke kyā kar chale

uThā kar hameñ tū ne rusvā kiyā

sazā dil lagāne kī pā kar chale

miTe saikḌoñ kūcha-e-ishq meñ

na kambaḳht dil sar uThā kar chale

vo baiThe to baiThe mire dil pe tiir

chale to qayāmat bapā kar chale

mujhe rote meñ aa ke ba.ad-e-fanā

vo mayyat par aañsū bahā kar chale

vo Thukrā ga.e merī turbat ko kyā

ki fitne hazāroñ jagā kar chale

huā un ke aage jo 'hāmid' kā zikr

to kis naaz se muskurā kar chale

wafa karne aae jafa kar chale

hamein KHak mein wo mila kar chale

ye kya tum ko sujhi ye kya kar chale

ki chitwan se bismil bana kar chale

mujhe qatl tegh-e-jafa kar chale

ye kya kar chale tum ye kya kar chale

milai kabhi tum ne jis se nigah

use apna shaida bana kar chale

teri rah mein misl-e-naqsh-e-qadam

hum apne ko kya kya miTa kar chale

idhar aao baiTho bhi aaghosh mein

kahan mujh se aankhen chura kar chale

tumhein pas agar baiThna hi na tha

to kyon hum se tum dil laga kar chale

zaban par na lana tha harf-e-gila

teri bazm se munh ki kha kar chale

azal ka tumhein qaul hai yaad bhi

ki aae the kya kah ke kya kar chale

uTha kar hamein tu ne ruswa kiya

saza dil lagane ki pa kar chale

miTe saikDon kucha-e-ishq mein

na kambaKHt dil sar uTha kar chale

wo baiThe to baiThe mere dil pe tir

chale to qayamat bapa kar chale

mujhe rote mein aa ke baad-e-fana

wo mayyat par aansu baha kar chale

wo Thukra gae meri turbat ko kya

ki fitne hazaron jaga kar chale

hua un ke aage jo 'hamid' ka zikr

to kis naz se muskura kar chale