wafa ke sath mohabbat mein nam paida kar

vafā ke saath mohabbat meñ naam paidā kar

yūñhī jahāñ meñ qayām-e-davām paidā kar

tire liye nahīñ kaunain meñ jo gunjā.ish

kisī ke dil hī meñ jā-e-qayām paidā kar

ho jis tarah guzar āñdhī kī tarah manzil se

qadam baḌhā talab-e-tez-gām paidā kar

ye anjum-o-mah-o-ḳhurshīd ho chuke būḌhe

na.ī tajallī-e-bālā-e-bām paidā kar

na reñg mausamī kīḌoñ kī tarah pastī par

falak se bhī koī ūñchā maqām paidā kar

jis anjuman meñ guzar ho tirā mahak jaa.e

sabā kī tarah shagufta ḳhirām paidā kar

bahut udaas hai ab rañg-e-mahfil-e-hastī

jabīñ se sub.h to zulfoñ se shaam paidā kar

ho ek haath meñ shamshīr dūsre meñ qalam

unhī ke zor se duniyā meñ naam paidā kar

nigāh-e-mast se sāġhar bahut piye tū ne

ab aur hī koī 'maḳhmūr' jaam paidā kar

wafa ke sath mohabbat mein nam paida kar

yunhi jahan mein qayam-e-dawam paida kar

tere liye nahin kaunain mein jo gunjaish

kisi ke dil hi mein ja-e-qayam paida kar

ho jis tarah guzar aandhi ki tarah manzil se

qadam baDha talab-e-tez-gam paida kar

ye anjum-o-mah-o-KHurshid ho chuke buDhe

nai tajalli-e-baala-e-baam paida kar

na reng mausami kiDon ki tarah pasti par

falak se bhi koi uncha maqam paida kar

jis anjuman mein guzar ho tera mahak jae

saba ki tarah shagufta KHiram paida kar

bahut udas hai ab rang-e-mahfil-e-hasti

jabin se subh to zulfon se sham paida kar

ho ek hath mein shamshir dusre mein qalam

unhi ke zor se duniya mein nam paida kar

nigah-e-mast se saghar bahut piye tu ne

ab aur hi koi 'maKHmur' jam paida kar