wafa-kesh-o-wafa-na-ashna kya

vafā-kesh-o-vafā-nā-āshnā kyā

mohabbat meñ balāoñ kā gila kyā

yahī do ek naġhme vo bhī be-saut

shikasta-sāz huuñ merī sadā kyā

na dekheñ vo hamāre dil kī mayyat

dil-e-marhūm kā ab ḳhūñ-bahā kyā

adāvat bijliyoñ kī mol le lī

chaman meñ do-ghaḌī ko maiñ hañsā kyā

ye aql-o-āgahī ke ḳhaam da.ave

kabhī sochā bhī ye tū ne ki thā kyā

faqat ik zer-e-lab mub.ham tabassum

hamārī aarzū kyā mudda.ā kyā

vafā.eñ ain īmān-e-mohabbat

mohabbat meñ vafāoñ kā sila kyā

shanāvar ke liye girdāb sāhil

ġham-e-be-chārgī-e-nāḳhudā kyā

tirā partav hai jis ko husn kah deñ

muqābil ho tire hai dūsrā kyā

mohabbat kī ye vo manzil hai jis meñ

davā-e-dard-o-dard-e-lā-davā kyā

zamāne-bhar ne nazreñ pher lī haiñ

hue ho tum bas ik ham se ḳhafā kyā

mujhe saarī ḳhudā.ī mil ga.ī hai

diyā hai tum ne dard-e-lā-davā kyā

jo sar-mastī hai in āñkhoñ meñ pinhāñ

'jalīl' is duḳht-e-raz meñ vo mazā kyā

wafa-kesh-o-wafa-na-ashna kya

mohabbat mein balaon ka gila kya

yahi do ek naghme wo bhi be-saut

shikasta-saz hun meri sada kya

na dekhen wo hamare dil ki mayyat

dil-e-marhum ka ab KHun-baha kya

adawat bijliyon ki mol le li

chaman mein do-ghaDi ko main hansa kya

ye aql-o-agahi ke KHam dawe

kabhi socha bhi ye tu ne ki tha kya

faqat ek zer-e-lab mubham tabassum

hamari aarzu kya muddaa kya

wafaen ain iman-e-mohabbat

mohabbat mein wafaon ka sila kya

shanawar ke liye girdab sahil

gham-e-be-chaargi-e-naKHuda kya

tera partaw hai jis ko husn kah den

muqabil ho tere hai dusra kya

mohabbat ki ye wo manzil hai jis mein

dawa-e-dard-o-dard-e-la-dawa kya

zamane-bhar ne nazren pher li hain

hue ho tum bas ek hum se KHafa kya

mujhe sari KHudai mil gai hai

diya hai tum ne dard-e-la-dawa kya

jo sar-masti hai in aankhon mein pinhan

'jalil' is duKHt-e-raz mein wo maza kya