wafa KHulus ka singar roz karti hai

vafā ḳhulūs kā singār roz kartī hai

yuuñ dhīre dhīre mirī zindagī sañvartī hai

koī hayāt zamāne ko hai 'azīz bahut

koī hayāt hai ki roz roz martī hai

tire charāġh kā fānūs ḳhud havā hai aur

mire charāġh se zālim havā guzartī hai

to phir vajūd-e-imārat nazar kā hai dhoka

jab iiñT iiñT hī tā'mīr se mukartī hai

du'ā ye kījiye yāroñ ki hosh meñ aa.uuñ

mirī nigāh mohabbat talāsh kartī hai

na ḳhud ke rahtā hai insāñ na dūsroñ ke qarīb

koī hasīn shanāsā.ī jab bikhartī hai

sitamgaroñ ko 'ibādat-guzār mat jaano

ḳhudā kī bandagī 'az.har' ḳhudā se Dartī hai

wafa KHulus ka singar roz karti hai

yun dhire dhire meri zindagi sanwarti hai

koi hayat zamane ko hai 'aziz bahut

koi hayat hai ki roz roz marti hai

tere charagh ka fanus KHud hawa hai aur

mere charagh se zalim hawa guzarti hai

to phir wajud-e-imarat nazar ka hai dhoka

jab inT inT hi ta'mir se mukarti hai

du'a ye kijiye yaron ki hosh mein aaun

meri nigah mohabbat talash karti hai

na KHud ke rahta hai insan na dusron ke qarib

koi hasin shanasai jab bikharti hai

sitamgaron ko 'ibaadat-guzar mat jaano

KHuda ki bandagi 'azhar' KHuda se Darti hai