وفا کی لاج ہوں میں پیار کا سمندر ہوں

وفا کی لاج ہوں میں پیار کا سمندر ہوں

یہ تجھ سے کس نے کہا راستے کا پتھر ہوں

دلوں پہ جن کے شجاعت کا نقش ہے میری

وہ اعتراف کریں گے کہ میں سکندر ہوں

بہار ڈھونڈھتی پھرتی ہے جس کو عالم میں

اہالیان چمن میں وہی تو منظر ہوں

پڑا ہوا ہوں ابھی پتھروں کے بیچ مگر

مجھے بھی دیکھ زمانے کہ میں بھی گوہر ہوں

وہ آج ڈھونڈ رہا ہے ادھر ادھر مجھ کو

اسے خبر ہی نہیں میں زمیں کے اندر ہوں

یہ غم تو سوزؔ کا دامن پکڑ کے کہتا ہے

تو مجھ سے دور نہ جا میں ترا مقدر ہوں