wafa ki laj hun main pyar ka samundar hun

vafā kī laaj huuñ maiñ pyaar kā samundar huuñ

ye tujh se kis ne kahā rāste kā patthar huuñ

diloñ pe jin ke shujā.at kā naqsh hai merī

vo e'tirāf kareñge ki meñ sikandar huuñ

bahār DhūñDhtī phirtī hai jis ko aalam meñ

ahāliyān-e-chaman maiñ vahī to manzar huuñ

paḌā huā huuñ abhī pattharoñ ke beach magar

mujhe bhī dekh zamāne ki maiñ bhī gauhar huuñ

vo aaj DhūñD rahā hai idhar udhar mujh ko

use ḳhabar hī nahīñ maiñ zamīñ ke andar huuñ

ye ġham to 'soz' kā dāman pakaḌ ke kahtā hai

tū mujh se duur na jā maiñ tirā muqaddar huuñ

wafa ki laj hun main pyar ka samundar hun

ye tujh se kis ne kaha raste ka patthar hun

dilon pe jin ke shujaat ka naqsh hai meri

wo e'tiraf karenge ki mein sikandar hun

bahaar DhunDhti phirti hai jis ko aalam mein

ahaaliyan-e-chaman main wahi to manzar hun

paDa hua hun abhi pattharon ke beach magar

mujhe bhi dekh zamane ki main bhi gauhar hun

wo aaj DhunD raha hai idhar udhar mujh ko

use KHabar hi nahin main zamin ke andar hun

ye gham to 'soz' ka daman pakaD ke kahta hai

tu mujh se dur na ja main tera muqaddar hun