wafa ki rah mein gul hi nahin hai Khaar bhi hai

vafā kī raah meñ gul hī nahīñ hai ḳhaar bhī hai

ye jurm vo hai ki pādāsh us kī daar bhī hai

sañbhal ke aa mire hamdam ki rāh-e-ishq-o-vafā

maqām-e-sajda bhī maidān-e-kār-zār bhī hai

mire ḳhudā tirī rahmat kī aas rakhtā hai

tirā ye banda ki ḳhātī bhī sharmsār bhī hai

ḳhizāñ kā daur hai ghabrā na bulbul-e-ġhamgīñ

ḳhizāñ ke ba.ad hī phir mausam-e-bahār bhī hai

vo vaqt duur nahīñ hai ki phir tū chahkegā

ki ḳhārzār meñ poshīda lāla-zār bhī hai

nashe meñ mast haiñ jo log vo bhī ye sun leñ

nashe ke ba.ad hī a.azā-shikan ḳhumār bhī hai

ye kārobār-e-mohabbat bhī kyā balā hai 'urūj'

yaqīñ hai va.ada-ḳhilāfī kā intizār bhī hai

wafa ki rah mein gul hi nahin hai KHar bhi hai

ye jurm wo hai ki padash us ki dar bhi hai

sanbhal ke aa mere hamdam ki rah-e-ishq-o-wafa

maqam-e-sajda bhi maidan-e-kar-zar bhi hai

mere KHuda teri rahmat ki aas rakhta hai

tera ye banda ki KHati bhi sharmsar bhi hai

KHizan ka daur hai ghabra na bulbul-e-ghamgin

KHizan ke baad hi phir mausam-e-bahaar bhi hai

wo waqt dur nahin hai ki phir tu chahkega

ki KHarzar mein poshida lala-zar bhi hai

nashe mein mast hain jo log wo bhi ye sun len

nashe ke baad hi aaza-shikan KHumar bhi hai

ye karobar-e-mohabbat bhi kya bala hai 'uruj'

yaqin hai wada-KHilafi ka intizar bhi hai