wafa ki rah mein kanTe farawani se milte hain

vafā kī raah meñ kāñTe farāvānī se milte haiñ

hazāroñ zaḳhm dil kī ek nādānī se milte haiñ

shikast-e-dil hī me.arāj-e-mohabbat kā vasīla hai

vafā ke zābte bhī ḳhāna-vīrānī se milte haiñ

sabā kī chheḌ se shīrāza-e-gul kā bichhaḌ jaanā

ye sab andāz dil kī chāk-dāmānī se milte haiñ

nigāheñ hoñ to phir qaid-e-makān-o-lā-makāñ kaisī

basīrat ho to phir jalve bhī āsānī se milte haiñ

hamāre dostoñ ke dil kā aalam dost hī jāneñ

ba-zāhir to bahut hī ḳhanda-peshānī se milte haiñ

pareshānī kabhī insān ko aañsū rulātī hai

kabhī taskīn ke sāmāñ pareshānī se milte haiñ

zabāñ meñ tāb-e-goyā.ī nahīñ arz-e-talab kyā ho

ham un se sūrat-e-ā.īna hairānī se milte haiñ

gudāz-e-rūh se ehsās-e-ġham bedār hotā hai

nishān-e-manzil-e-jāñ ashk afshānī se milte haiñ

hameñ apnī tabāhī par pashemānī nahīñ hotī

jhukā kar vo nigāheñ jab pashemānī se milte haiñ

na tuur un se shanāsā hai na daar un se shanāsā hai

tire jalve tire jalvoñ kī tābānī se milte haiñ

mohabbat kī fazāoñ meñ 'tufail' aksar ye dekhā hai

dahaktī aag se ġhunche sharar paanī se milte haiñ

wafa ki rah mein kanTe farawani se milte hain

hazaron zaKHm dil ki ek nadani se milte hain

shikast-e-dil hi mearaj-e-mohabbat ka wasila hai

wafa ke zabte bhi KHana-virani se milte hain

saba ki chheD se shiraaza-e-gul ka bichhaD jaana

ye sab andaz dil ki chaak-damani se milte hain

nigahen hon to phir qaid-e-makan-o-la-makan kaisi

basirat ho to phir jalwe bhi aasani se milte hain

hamare doston ke dil ka aalam dost hi jaanen

ba-zahir to bahut hi KHanda-peshani se milte hain

pareshani kabhi insan ko aansu rulati hai

kabhi taskin ke saman pareshani se milte hain

zaban mein tab-e-goyai nahin arz-e-talab kya ho

hum un se surat-e-aina hairani se milte hain

gudaz-e-ruh se ehsas-e-gham bedar hota hai

nishan-e-manzil-e-jaan ashk afshani se milte hain

hamein apni tabahi par pashemani nahin hoti

jhuka kar wo nigahen jab pashemani se milte hain

na tur un se shanasa hai na dar un se shanasa hai

tere jalwe tere jalwon ki tabani se milte hain

mohabbat ki fazaon mein 'tufail' aksar ye dekha hai

dahakti aag se ghunche sharar pani se milte hain