wafa ki rah se mastana-war hum guzre

vafā kī raah se mastānā-vār ham guzre

hazār manzileñ aa.iiñ hazār ġham guzre

hayāt silsila-e-ġham sahī magar ai dost

ḳhayāl meñ haiñ vahī hādse jo kam guzre

ḳhushī ke phuul khilā.e the is nazar ne jahāñ

ham us dayār se aksar ba-chashm-e-nam guzre

sitam-zada sī hai duniyā tumhāre jaane se

kaheñ to kis se kaheñ ham pe kyā sitam guzre

khaḌe haiñ der se ham darmiyān-e-ka.aba-o-dair

idhar se kaash koī sāhab-e-karam guzre

bahut hujūm sahī un kī raah meñ lekin

vahāñ to koī nahīñ thā jahāñ se ham guzre

nishān-e-manzil-e-jānāñ to mil gayā 'shāhid'

magar ye ġham hai ki rāhoñ ke pech-o-ḳham guzre

wafa ki rah se mastana-war hum guzre

hazar manzilen aain hazar gham guzre

hayat silsila-e-gham sahi magar ai dost

KHayal mein hain wahi hadse jo kam guzre

KHushi ke phul khilae the is nazar ne jahan

hum us dayar se aksar ba-chashm-e-nam guzre

sitam-zada si hai duniya tumhaare jaane se

kahen to kis se kahen hum pe kya sitam guzre

khaDe hain der se hum darmiyan-e-kaba-o-dair

idhar se kash koi sahab-e-karam guzre

bahut hujum sahi un ki rah mein lekin

wahan to koi nahin tha jahan se hum guzre

nishan-e-manzil-e-jaanan to mil gaya 'shahid'

magar ye gham hai ki rahon ke pech-o-KHam guzre