wafa ki raushni kam ho rahi hai

vafā kī raushnī kam ho rahī hai

tabī.at mā.il-e-ġham ho rahī hai

siyah-baḳhtī ke saa.e baḌh rahe haiñ

sukūñ kī zulf barham ho rahī hai

ummīdeñ yaas meñ Duubī huī haiñ

tamannā bā.is-e-ġham ho rahī hai

vafā ke naam ko tum bhī miTā do

vafā tamhīd-e-mātam ho rahī hai

ye kis andāz se dekhā hai tum ne

ḳhushī se aañkh pur-nam ho rahī hai

ḳhalish kī manzilat hai mere dil meñ

ḳhalish se yaad paiham ho rahī hai

bahut se rañg badlegā zamāna

abas tanzīm-e-ālam ho rahī hai

nafas ke taar TuuTe jā rahe haiñ

ki chashm-e-'mauj' pur-nam ho rahī hai

wafa ki raushni kam ho rahi hai

tabiat mail-e-gham ho rahi hai

siyah-baKHti ke sae baDh rahe hain

sukun ki zulf barham ho rahi hai

ummiden yas mein Dubi hui hain

tamanna bais-e-gham ho rahi hai

wafa ke nam ko tum bhi miTa do

wafa tamhid-e-matam ho rahi hai

ye kis andaz se dekha hai tum ne

KHushi se aankh pur-nam ho rahi hai

KHalish ki manzilat hai mere dil mein

KHalish se yaad paiham ho rahi hai

bahut se rang badlega zamana

abas tanzim-e-alam ho rahi hai

nafas ke tar TuTe ja rahe hain

ki chashm-e-'mauj' pur-nam ho rahi hai