wafa kya hai aur kya jafa-e-sanam hai

vafā kyā hai aur kyā jafā-e-sanam hai

vahī jaane jo āshnā-e-sanam hai

use arz-e-duniyā kī vus'at se kyā hai

jise nisbat-e-ḳhāk-e-pā-e-sanam hai

ye duniyā nahīñ tūr-e-sīnā hai shāyad

jise dekho yaañ mubtalā-e-sanam hai

yuuñ hī qais-o-farhād majnūñ nahīñ the

ye dīvāna-pan hī razā-e-sanam hai

ye ambar ye atlas bhī ḳhūgar haiñ jis ke

vo ḳhush-bū-e-dast-e-hinā-e-sanam hai

'sahar' sū-e-maqtal bhī uf tak na karnā

yahī intihā-e-vafā-e-sanam hai

wafa kya hai aur kya jafa-e-sanam hai

wahi jaane jo aashna-e-sanam hai

use arz-e-duniya ki wus'at se kya hai

jise nisbat-e-KHak-e-pa-e-sanam hai

ye duniya nahin tur-e-sina hai shayad

jise dekho yan mubtala-e-sanam hai

yun hi qais-o-farhad majnun nahin the

ye diwana-pan hi raza-e-sanam hai

ye ambar ye atlas bhi KHugar hain jis ke

wo KHush-bu-e-dast-e-hina-e-sanam hai

'sahar' su-e-maqtal bhi uf tak na karna

yahi intiha-e-wafa-e-sanam hai