wafa mein barabar jise tol lenge

vafā meñ barābar jise tol leñge

use saltanat bech kar mol leñge

ijāzat agar sar paTakne kī hogī

muqaffal dar-e-yār ham khol leñge

kisī din jo palTā muqaddar hamārā

bike jis ke hāthoñ use mol leñge

guloñ se na hogī jo uqda-kushā.ī

girah dil kī kāñTe se ham khol leñge

hameñ baaġh jaane se ye mudda.ā hai

zarā bulbul-o-gul se hañs-bol leñge

abhī ham se aur un se sohbat na.ī hai

jo muñh lag chaleñge to hañs-bol leñge

ġham-e-yār bhī abr-e-naisāñ hai ai 'bahr'

jo tapkeñge aañsū guhar rol leñge

wafa mein barabar jise tol lenge

use saltanat bech kar mol lenge

ijazat agar sar paTakne ki hogi

muqaffal dar-e-yar hum khol lenge

kisi din jo palTa muqaddar hamara

bike jis ke hathon use mol lenge

gulon se na hogi jo uqda-kushai

girah dil ki kanTe se hum khol lenge

hamein bagh jaane se ye muddaa hai

zara bulbul-o-gul se hans-bol lenge

abhi hum se aur un se sohbat nai hai

jo munh lag chalenge to hans-bol lenge

gham-e-yar bhi abr-e-naisan hai ai 'bahr'

jo tapkenge aansu guhar rol lenge