wafa na-ashnaon mein wafa ki justuju kab tak

vafā nā-āshnāoñ meñ vafā kī justujū kab tak

dil-e-sāda mujhe rusvā karegā kū-ba-kū kab tak

huā hai chaak jin hāthoñ se ummīdoñ kā pairāhan

unhīñ hāthoñ ko ham dete raheñ dād-e-rafū kab tak

bahar-sūrat duāoñ par muqaddam hai amal zāhid

ḳhamīda-sar kahāñ tak haath masrūf-e-vuzū kab tak

hameñ apnā muqaddar apne hāthoñ se banānā hai

kahāñ tak ḳhud-farāmoshī fareb-e-ārzū kab tak

bahāroñ ko taras jā.egā gulshan ham na kahte the

ḳhizāñ-parvarda hāthoñ meñ jahān-e-rañg-o-bū kab tak

kahāñ tak ismateñ nīlām hoñgī be-sahāroñ kī

bahegā shāh-rāhoñ pe ġharīboñ kā lahū kab tak

zamīñ phaT jaa.e yā sar par balā-e-āsmāñ TuuTe

zabāñ bhī kholiye 'farhat' nazar se guftugū kab tak

wafa na-ashnaon mein wafa ki justuju kab tak

dil-e-sada mujhe ruswa karega ku-ba-ku kab tak

hua hai chaak jin hathon se ummidon ka pairahan

unhin hathon ko hum dete rahen dad-e-rafu kab tak

bahar-surat duaon par muqaddam hai amal zahid

KHamida-sar kahan tak hath masruf-e-wuzu kab tak

hamein apna muqaddar apne hathon se banana hai

kahan tak KHud-faramoshi fareb-e-arzu kab tak

bahaaron ko taras jaega gulshan hum na kahte the

KHizan-parwarda hathon mein jahan-e-rang-o-bu kab tak

kahan tak ismaten nilam hongi be-sahaaron ki

bahega shah-rahon pe gharibon ka lahu kab tak

zamin phaT jae ya sar par bala-e-asman TuTe

zaban bhi kholiye 'farhat' nazar se guftugu kab tak