wafa-sarisht hun duri mein bhi mohabbat hai

vafā-sarisht huuñ duurī meñ bhī mohabbat hai

akele rahne meñ lekin baḌī aziyyat hai

ye jāgtī hai to phir der tak jagātī hai

mire vajūd meñ soī huī jo vahshat hai

jahāñ pe ishq kī sarhad junūñ se miltī hai

vahāñ pe aa ke mile vo agar mohabbat hai

bahut haiñ ḳhvāb magar ḳhvāb hī se kyā hogā

hamāre biich jo haa.il hai vo haqīqat hai

vo daur aayā ki vo bhī gharoñ ko chhoḌ ga.e

jo sochte the ki ab mustaqil sukūnat hai

samajh rahī thī maiñ apne qayām ko manzil

ḳhabar nahīñ thī ki aage bhī ek hijrat hai

bahut se log diloñ meñ chhupā.e baiThe haiñ

ye 'fātima' hī nahīñ hai jise shikāyat hai

wafa-sarisht hun duri mein bhi mohabbat hai

akele rahne mein lekin baDi aziyyat hai

ye jagti hai to phir der tak jagati hai

mere wajud mein soi hui jo wahshat hai

jahan pe ishq ki sarhad junun se milti hai

wahan pe aa ke mile wo agar mohabbat hai

bahut hain KHwab magar KHwab hi se kya hoga

hamare bich jo hail hai wo haqiqat hai

wo daur aaya ki wo bhi gharon ko chhoD gae

jo sochte the ki ab mustaqil sukunat hai

samajh rahi thi main apne qayam ko manzil

KHabar nahin thi ki aage bhi ek hijrat hai

bahut se log dilon mein chhupae baiThe hain

ye 'fatima' hi nahin hai jise shikayat hai