wafa se pasheman jafa ho rahi hai

vafā se pashemāñ jafā ho rahī hai

mohabbat kī qīmat adā ho rahī hai

davā ho rahī hai duā ho rahī hai

magar dil kī uljhan sivā ho rahī hai

Duboī hai jis ne abhī dil kī kashtī

vahī aas phir nāḳhudā ho rahī hai

guloñ meñ bhī hai rañg begānagī kā

ajab is chaman kī havā ho rahī hai

nigāhoñ se parde haTe jā rahe haiñ

ḳhudī kī ḳhudā.ī fanā ho rahī hai

talab par bhī husn-e-talab kī hai koshish

nazar kuchh mizāj-āshnā ho rahī hai

mire dard kī ibtidā karne vaale

tire zulm kī intihā ho rahī hai

tirī raah meñ miTne vāloñ kī qismat

fanā ko bhī hāsil baqā ho rahī hai

sitam ko sitam 'jurm' hargiz na kahte

agar ye samajhte ḳhatā ho rahī hai

wafa se pasheman jafa ho rahi hai

mohabbat ki qimat ada ho rahi hai

dawa ho rahi hai dua ho rahi hai

magar dil ki uljhan siwa ho rahi hai

Duboi hai jis ne abhi dil ki kashti

wahi aas phir naKHuda ho rahi hai

gulon mein bhi hai rang beganagi ka

ajab is chaman ki hawa ho rahi hai

nigahon se parde haTe ja rahe hain

KHudi ki KHudai fana ho rahi hai

talab par bhi husn-e-talab ki hai koshish

nazar kuchh mizaj-ashna ho rahi hai

mere dard ki ibtida karne wale

tere zulm ki intiha ho rahi hai

teri rah mein miTne walon ki qismat

fana ko bhi hasil baqa ho rahi hai

sitam ko sitam 'jurm' hargiz na kahte

agar ye samajhte KHata ho rahi hai