وفائیں ہوں گی زیب طاق نسیاں ہم نہ کہتے تھے

وفائیں ہوں گی زیب طاق نسیاں ہم نہ کہتے تھے

بھلا بیٹھو گے تم سب عہد و پیماں ہم نہ کہتے تھے

ملیں گے خاک میں سب دل کے ارماں ہم نہ کہتے تھے

چمن بن جائے گا خواب پریشاں ہم نہ کہتے تھے

اٹھاؤ گے نہ کچھ لطف بہاراں ہم نہ کہتے تھے

کرو گے تم بھی اک دن چاک داماں ہم نہ کہتے تھے

چھپاؤ گے تم اپنا درد دل کب تک تصنع سے

ابھر آئے گا آخر زخم پنہاں ہم نہ کہتے تھے

ملے گی لذت کام و دہن جب خون ناحق سے

بڑھے گا اور بھی یہ ذوق عصیاں ہم نہ کہتے تھے

رقابت کشمکش اور یہ کدورت اہل گلشن کی

لہو رلوائے گی فصل بہاراں ہم نہ کہتے تھے

مناؤ خیر اپنی اب مرا گھر پھونکنے والو

کہیں تم بھی نہ ہو شعلہ بداماں ہم نہ کہتے تھے

جدھر دیکھو زکیؔ تخریب کی فرماں روائی ہے

اٹھے گا خاک کے ذروں سے طوفاں ہم نہ کہتے تھے