وفاؤں کا اسے میری اگر اقرار ہو جائے

وفاؤں کا اسے میری اگر اقرار ہو جائے

ہزاروں غم اٹھانے کو یہ دل تیار ہو جائے

بہت محتاط رہتا ہوں میں اپنی رشتہ سازی پر

کہیں ایسا نہ ہو پھر سے کوئی تکرار ہو جائے

جو تیرا ساتھ ہے مجھ کو تو کیا خدشہ تلاطم کا

یہ کشتی ڈوب جائے یا بھلے سے پار ہو جائے

بڑا جادو جھلکتا ہے تری مسرور آنکھوں میں

نظر اک دیکھ لے جس کو وہی فنکار ہو جائے

غموں کی بھیڑ میں کٹتے نہیں اب روز و شب قادرؔ

شکستہ دل کے گوشے میں کوئی جھنکار ہو جائے