wafaon ke irade wusat-e-manzil mein rahte hain

vafāoñ ke irāde vus.at-e-manzil meñ rahte haiñ

pas-o-pesh-e-sitam pesh-o-pas-e-mahmil meñ rahte haiñ

nuqūsh-e-rah-rav-e-manzil rah-e-manzil meñ rahte haiñ

chakoroñ ke nishān-e-ġham mah-e-kāmil meñ rahte haiñ

ġham-e-ishq-e-haqīqī be-asar ho jaa.e nā-mumkin

numāyāñ laġhzish-o-ra.asha kaf-e-qātil meñ rahte haiñ

jo armāñ lab pe aa ke mojib-e-qatl-e-ġharībāñ haiñ

vahī armān poshīda dil-e-qātil meñ rahte haiñ

hazāroñ kashtiyāñ us paar ho jaatī haiñ sāhil ke

hamāre vāste tūfāñ chhupe sāhil meñ rahte haiñ

hamesha zindagī kaTtī rahī tārīk rātoñ meñ

na jaane jvār-bhāTe kyuuñ hamāre dil meñ rahte haiñ

zamāna ke havādis se na Dar hargiz muqābil aa

jo ahl-e-dil haiñ duniyā meñ vahī mushkil meñ rahte haiñ

mai-e-rañgīñ surūd-e-shoḳh raqs-e-dil-rubā shab ko

sahar ko 'soz' furqat ke nishāñ mahfil meñ rahte haiñ

wafaon ke irade wusat-e-manzil mein rahte hain

pas-o-pesh-e-sitam pesh-o-pas-e-mahmil mein rahte hain

nuqush-e-rah-raw-e-manzil rah-e-manzil mein rahte hain

chakoron ke nishan-e-gham mah-e-kaamil mein rahte hain

gham-e-ishq-e-haqiqi be-asar ho jae na-mumkin

numayan laghzish-o-rasha kaf-e-qatil mein rahte hain

jo arman lab pe aa ke mojib-e-qatl-e-ghariban hain

wahi arman poshida dil-e-qatil mein rahte hain

hazaron kashtiyan us par ho jati hain sahil ke

hamare waste tufan chhupe sahil mein rahte hain

hamesha zindagi kaTti rahi tarik raaton mein

na jaane jwar-bhaTe kyun hamare dil mein rahte hain

zamana ke hawadis se na Dar hargiz muqabil aa

jo ahl-e-dil hain duniya mein wahi mushkil mein rahte hain

mai-e-rangin surud-e-shoKH raqs-e-dil-ruba shab ko

sahar ko 'soz' furqat ke nishan mahfil mein rahte hain