wafur-e-ishtiyaq mein zaban se kya nikal gaya

vafūr-e-ishtiyāq meñ zabāñ se kyā nikal gayā

phir us ke baa'd bazm kā mizāj hī badal gayā

idhar-udhar ke log to kareñge us kī parvarish

zarā sā koī ḳhauf bhī agar diloñ meñ pal gayā

hamārī raat jagmagā rahī hai āb-o-tāb se

zamīñ kā chāñd āsmāñ ke chāñd ko nigal gayā

makān se makān to hue haiñ muttasil magar

ḳhulūs jis kā naam thā vo shahr se nikal gayā

ye bhed puure shahr ko diyā hai maiñ ne is liye

ki hote hote baat kā pata use bhī chal gayā

na-jāne us ghaḌī thī kyā dil-o-nazar kī kaifiyat

chhuā jo maiñ ne phuul ko to merā haath jal gayā

wafur-e-ishtiyaq mein zaban se kya nikal gaya

phir us ke ba'd bazm ka mizaj hi badal gaya

idhar-udhar ke log to karenge us ki parwarish

zara sa koi KHauf bhi agar dilon mein pal gaya

hamari raat jagmaga rahi hai aab-o-tab se

zamin ka chand aasman ke chand ko nigal gaya

makan se makan to hue hain muttasil magar

KHulus jis ka nam tha wo shahr se nikal gaya

ye bhed pure shahr ko diya hai main ne is liye

ki hote hote baat ka pata use bhi chal gaya

na-jaane us ghaDi thi kya dil-o-nazar ki kaifiyat

chhua jo main ne phul ko to mera hath jal gaya