wahan mahfil na sajai jahan KHalwat nahin ki

vahāñ mahfil na sajā.ī jahāñ ḳhalvat nahīñ kī

us ko sochā hī nahīñ jis se mohabbat nahīñ kī

ab ke bhī tere liye jaañ se guzar jā.eñge ham

ham ne pahle bhī mohabbat meñ siyāsat nahīñ kī

tum se kyā vāda-ḳhilāfī kī shikāyat karte

tum ne to lauT ke aane kī bhī zahmat nahīñ kī

dhaḌkaneñ siine se āñkhoñ meñ simaT aa.ī thiiñ

vo bhī ḳhāmosh thā ham ne bhī vazāhat nahīñ kī

raat ko raat hī is baar kahā hai ham ne

ham ne is baar bhī tauhīn-e-adālat nahīñ kī

gard-e-ā.īna haTā.ī hai ki sachchā.ī khule

varna tum jānte ho ham ne baġhāvat nahīñ kī

bas hameñ ishq kī āshufta-sarī khīñchtī hai

rizq ke vāste ham ne kabhī hijrat nahīñ kī

aa zarā dekh leñ duniyā ko bhī kis haal meñ hai

ka.ī din ho ga.e dushman kī ziyārat nahīñ kī

tum ne sab kuchh kiyā insān kī izzat nahīñ kī

kyā huā vaqt ne jo tum se ri.āyat nahīñ kī

wahan mahfil na sajai jahan KHalwat nahin ki

us ko socha hi nahin jis se mohabbat nahin ki

ab ke bhi tere liye jaan se guzar jaenge hum

hum ne pahle bhi mohabbat mein siyasat nahin ki

tum se kya wada-KHilafi ki shikayat karte

tum ne to lauT ke aane ki bhi zahmat nahin ki

dhaDkanen sine se aankhon mein simaT aai thin

wo bhi KHamosh tha hum ne bhi wazahat nahin ki

raat ko raat hi is bar kaha hai hum ne

hum ne is bar bhi tauhin-e-adalat nahin ki

gard-e-aina haTai hai ki sachchai khule

warna tum jaante ho hum ne baghawat nahin ki

bas hamein ishq ki aashufta-sari khinchti hai

rizq ke waste hum ne kabhi hijrat nahin ki

aa zara dekh len duniya ko bhi kis haal mein hai

kai din ho gae dushman ki ziyarat nahin ki

tum ne sab kuchh kiya insan ki izzat nahin ki

kya hua waqt ne jo tum se riayat nahin ki