wahi aahaTen dar-o-baam par wahi rat-jagon ke azab hain

vahī āhaTeñ dar-o-bām par vahī rat-jagoñ ke azaab haiñ

vahī adh-bujhī mirī niiñd hai vahī adh-jale mire ḳhvāb haiñ

mire sāmne ye jo ḳhvāhishoñ kī hai dhund had-e-nigāh tak

pare is ke jaane haqīqateñ ki haqīqatoñ ke sarāb haiñ

mirī dastaras meñ kabhī to hoñ jo haiñ ghaḌiyāñ kaif-o-nashāt kī

hai ye kyā ki aa.eñ idhar kabhī to lage ki pā-ba-rikāb haiñ

kabhī chāhā ḳhud ko sameTnā to bikhar ke aur bhī rah gayā

haiñ jo kirchī kirchī paḌe hue mire sāmne mire ḳhvāb haiñ

ye na pūchh kaise basar kiye shab-o-roz kitne pahar jiye

kise rāt-din kī tamīz thī kise yaad itne hisāb haiñ

unheñ ḳhauf rasm-o-rivāj kā hameñ vaz.a apnī aziiz hai

vo rivāyatoñ kī panāh meñ ham anā ke zer-e-itāb haiñ

abhī zaḳhm-e-nau kā shumār kyā abhī rut hai dil ke siñghār kī

abhī aur phūTeñgī koñpleñ abhī aur khilne gulāb haiñ

wahi aahaTen dar-o-baam par wahi rat-jagon ke azab hain

wahi adh-bujhi meri nind hai wahi adh-jale mere KHwab hain

mere samne ye jo KHwahishon ki hai dhund had-e-nigah tak

pare is ke jaane haqiqaten ki haqiqaton ke sarab hain

meri dastaras mein kabhi to hon jo hain ghaDiyan kaif-o-nashat ki

hai ye kya ki aaen idhar kabhi to lage ki pa-ba-rikab hain

kabhi chaha KHud ko sameTna to bikhar ke aur bhi rah gaya

hain jo kirchi kirchi paDe hue mere samne mere KHwab hain

ye na puchh kaise basar kiye shab-o-roz kitne pahar jiye

kise raat-din ki tamiz thi kise yaad itne hisab hain

unhen KHauf rasm-o-riwaj ka hamein waza apni aziz hai

wo riwayaton ki panah mein hum ana ke zer-e-itab hain

abhi zaKHm-e-nau ka shumar kya abhi rut hai dil ke singhaar ki

abhi aur phuTengi konplen abhi aur khilne gulab hain