wahi aashiq hai qatil ka na jo shaki wahan hoga

vahī āshiq hai qātil kā na jo shākī vahāñ hogā

jise dār-e-jazā samjhe haiñ dār-e-imtihāñ hogā

judā sab ālamoñ se ek din terā jahāñ hogā

mohabbat kī zamīñ hogī vafā kā āsmāñ hogā

na maiñ dair-o-haram samjhūñ na maiñ arsh-o-iram jānūñ

jahāñ sajde ko dil jhuk jaa.e terā āstāñ hogā

umīdeñ dil kī vābasta haiñ maidān-e-qayāmat se

na us jā ye zamīñ hogī na vaañ ye āsmāñ hogā

chhuḌāyā jis ne dāman kaash us ko ye ḳhabar hotī

ki unvān-e-qayāmat dard-e-dil kī dāstāñ hogā

vo jannat hai jo zāhid ke safar kī āḳhirī manzil

usī meñ pahlī manzil par hamārā kārvāñ hogā

asīrī meñ girī haiñ aah lākhoñ bijliyāñ dil par

jahāñ bijlī girī samjhe hamārā āshiyāñ hogā

firāq-e-jāvedānī intiqām-e-vasl-e-jānāñ hai

magar sadqe tire jaane bhī de ai āsmāñ hogā

fasāna dahr-o-gulzār-o-bahār-o-gul kā rahne de

agar kuchh hai bhī ai 'beḳhud' sivā.e āshiyāñ hogā

wahi aashiq hai qatil ka na jo shaki wahan hoga

jise dar-e-jaza samjhe hain dar-e-imtihan hoga

juda sab aalamon se ek din tera jahan hoga

mohabbat ki zamin hogi wafa ka aasman hoga

na main dair-o-haram samjhun na main arsh-o-iram jaanun

jahan sajde ko dil jhuk jae tera aastan hoga

umiden dil ki wabasta hain maidan-e-qayamat se

na us ja ye zamin hogi na wan ye aasman hoga

chhuDaya jis ne daman kash us ko ye KHabar hoti

ki unwan-e-qayamat dard-e-dil ki dastan hoga

wo jannat hai jo zahid ke safar ki aaKHiri manzil

usi mein pahli manzil par hamara karwan hoga

asiri mein giri hain aah lakhon bijliyan dil par

jahan bijli giri samjhe hamara aashiyan hoga

firaq-e-jawedani intiqam-e-wasl-e-jaanan hai

magar sadqe tere jaane bhi de ai aasman hoga

fasana dahr-o-gulzar-o-bahaar-o-gul ka rahne de

agar kuchh hai bhi ai 'beKHud' siwae aashiyan hoga