wahi aati wahi jati wahi rukti wahi baDhti

vahī aatī vahī jaatī vahī ruktī vahī baḌhtī

usī se dostī hotī usī se dushmanī baḌhtī

mujhe jaane diyā hotā to tum itnī nahīñ bujhtīñ

mirī raftār baḌhtī aur tumhārī raushnī baḌhtī

maiñ koī rāsta thoḌī thā manzil thā mohabbat kī

agar pahlī nazar-andāz kartī dūsrī baḌhtī

gale par neza rakh kar sar jhukāne ko kahā us ne

maiñ mar jaatā agar us vaqt mujh meñ ājizī baḌhtī

mire ajdād kā vahshī qabīle se ta.alluq thā

tirī vahshat bhī baḌhtī aur tirī aulād bhī baḌhtī

taqarrub se tajassus ḳhatm ho jaatā hai chīzoñ meñ

agar ham duur hote to mohabbat vāqa.ī baḌhtī

jo baḌhtī hai use aage nahīñ baḌhne diyā jaatā

jo haTtī hai use kahte haiñ tū to lāzmī baḌhtī

havā se bhī ziyāda tez thī raftār-e-uryānī

magar phir bhī mirī ḳhvāhish thī terī oḌhnī baḌhtī

koī mujh tak pahuñch jaatā to maiñ tujh tak pahuñch jaatā

kisī kī zindagī ghaTtī kisī kī zindagī baḌhtī

koī sahrā nahīñ thā maiñ jahāñ tūfān aa jaatā

koī jañgal nahīñ thā maiñ jahāñ chiñgārī hī baḌhtī

machhere kī mohabbat jaal bunvātī hai machhlī se

tirā bas chalne dete to hamārī bebasī baḌhtī

ta.aqqul mard meñ hotā hai aur jazbāt aurat meñ

mire jaisā koī ruktā tire jaisī koī baḌhtī

sahārā miltā hai kamzor ko shātir kī jānib se

maiñ zaḳhmī hotā to merī taraf bhī lomḌī baḌhtī

wahi aati wahi jati wahi rukti wahi baDhti

usi se dosti hoti usi se dushmani baDhti

mujhe jaane diya hota to tum itni nahin bujhtin

meri raftar baDhti aur tumhaari raushni baDhti

main koi rasta thoDi tha manzil tha mohabbat ki

agar pahli nazar-andaz karti dusri baDhti

gale par neza rakh kar sar jhukane ko kaha us ne

main mar jata agar us waqt mujh mein aajizi baDhti

mere ajdad ka wahshi qabile se talluq tha

teri wahshat bhi baDhti aur teri aulad bhi baDhti

taqarrub se tajassus KHatm ho jata hai chizon mein

agar hum dur hote to mohabbat waqai baDhti

jo baDhti hai use aage nahin baDhne diya jata

jo haTti hai use kahte hain tu to lazmi baDhti

hawa se bhi ziyaada tez thi raftar-e-uryani

magar phir bhi meri KHwahish thi teri oDhni baDhti

koi mujh tak pahunch jata to main tujh tak pahunch jata

kisi ki zindagi ghaTti kisi ki zindagi baDhti

koi sahra nahin tha main jahan tufan aa jata

koi jangal nahin tha main jahan chingari hi baDhti

machhere ki mohabbat jal bunwati hai machhli se

tera bas chalne dete to hamari bebasi baDhti

taqqul mard mein hota hai aur jazbaat aurat mein

mere jaisa koi rukta tere jaisi koi baDhti

sahaara milta hai kamzor ko shatir ki jaanib se

main zaKHmi hota to meri taraf bhi lomDi baDhti