وہی بے خانماں تقدیر ٹھہرے

وہی بے خانماں تقدیر ٹھہرے

مکیں ہو کر بھی جو رہ گیر ٹھہرے

پریشاں ہے بہت اس درد سے دل

ہوا ٹھہرے تو کچھ تدبیر ٹھہرے

ذرا کچھ کم ہو رفتار تعلق

ذرا کچھ دیر یہ زنجیر ٹھہرے

عیاں ہوتا ہے عریانی کا پہلو

ذرا شاخ گل انجیر ٹھہرے

دم شمشیر جب باہر ہوا ہے

یہ بازو سینۂ شمشیر ٹھہرے

کبھی تاخیر ٹھہرے کوئی عجلت

کوئی عجلت کبھی تاخیر ٹھہرے

مصور نے لگائی ہے عجب شرط

کوئی زندہ ہے تو تصویر ٹھہرے

میں دروازے سے آگے بڑھ چکا تھا

صدا آئی مرا دلگیر ٹھہرے

اگر میں کر سکوں ایجاد بھی کچھ

اگر ایجاد بھی تقصیر ٹھہرے