wahi hai nafs-e-mazmun sirf tadbiren badalti hain

vahī hai nafs-e-mazmūñ sirf tadbīreñ badaltī haiñ

huzūr-e-dost kyā kyā apnī taqrīreñ badaltī haiñ

ye nagrī husn vāloñ kī ajab nagrī hai ai hamdam

ki is nagrī meñ aahoñ kī bhī tāsīreñ badaltī haiñ

na itrā ai dil-e-nādāñ kisī ke ahd-o-paimāñ par

ki qaul o fel kyā logoñ kī tahrīreñ badaltī haiñ

ḳhudā.ī kā agar karte haiñ da.avā but nahīñ bejā

nigāh-e-lutf se dekheñ to taqdīreñ badaltī haiñ

koī saffāk jab dīdoñ meñ diide Daal detā hai

to dil se dil nahīñ ulfat kī jāgīreñ badaltī haiñ

kisī kāfir ke yaad aate haiñ andāz-o-adā jis dam

nazar ke sāmne kitnī hī tasvīreñ badaltī haiñ

kisī par barq girtī hai koī chaḌhtā hai suulī par

ba-qadar-e-zauq-e-mujrim 'ḳhār' ta.azīreñ badaltī haiñ

wahi hai nafs-e-mazmun sirf tadbiren badalti hain

huzur-e-dost kya kya apni taqriren badalti hain

ye nagri husn walon ki ajab nagri hai ai hamdam

ki is nagri mein aahon ki bhi tasiren badalti hain

na itra ai dil-e-nadan kisi ke ahd-o-paiman par

ki qaul o fel kya logon ki tahriren badalti hain

KHudai ka agar karte hain dawa but nahin beja

nigah-e-lutf se dekhen to taqdiren badalti hain

koi saffak jab didon mein dide Dal deta hai

to dil se dil nahin ulfat ki jagiren badalti hain

kisi kafir ke yaad aate hain andaz-o-ada jis dam

nazar ke samne kitni hi taswiren badalti hain

kisi par barq girti hai koi chaDhta hai suli par

ba-qadar-e-zauq-e-mujrim 'KHar' taziren badalti hain