وہی ہے رنگ طبیعت وہی خصال مرے

وہی ہے رنگ طبیعت وہی خصال مرے

تغیروں کے نشاں ہیں سفید بال مرے

قدم قدم پہ لٹائی ہے کائنات حیات

دیار و دشت میں بکھرے ہیں ماہ و سال مرے

ملوں نہ میں تو مرا گلشن نسب دیکھیں

مری شبیہ کا پرتو ہیں نونہال مرے

نئی فضا کا تقاضا کہ میں پنپ نہ سکوں

اکاس بیل سے رت نے بنے ہیں جال مرے

انہیں کے نام سے پہچان ہے مرے فن کی

مرا وقار ہیں یاران با کمال مرے

ملا بھی اذن تکلم تو کچھ کہا نہ گیا

سکوت لب میں مقفل رہے سوال مرے

میں اک مسافر موج سراب ہوں راسخؔ

کئے ہیں مسخ بگولوں نے خد و خال مرے