wahi hai shams wahi chand aur tara bas

vahī hai shams vahī chāñd aur taarā bas

hai muddatoñ se faqat ek hī nazārā bas

fanā to mujh ko mirī maut bhī na kar paa.ī

libās-e-ḳhāk mirā us ne hai utārā bas

patā nahīñ thā ye rakkhā thā jab qadam maiñ ne

ki rāh-e-ishq meñ hotā hai bas ḳhasārā bas

ḳhilāf jis ke thā us ne bhī daad dī mujh ko

thā lafz lafz mirā sher isti.ārā bas

thī lauh-e-dil pe ġhazal merī pahle se maujūd

ik ek sher ko qirtās par utrā bas

nazar meñ koī bhī tasvīr thī nahīñ maujūd

ḳhudā ko maiñ ne namāzoñ meñ hai pukārā bas

vahī to ek samī-o-basīr hai 'dānish'

musībatoñ meñ usī ko sadā pukārā bas

wahi hai shams wahi chand aur tara bas

hai muddaton se faqat ek hi nazara bas

fana to mujh ko meri maut bhi na kar pai

libas-e-KHak mera us ne hai utara bas

pata nahin tha ye rakkha tha jab qadam main ne

ki rah-e-ishq mein hota hai bas KHasara bas

KHilaf jis ke tha us ne bhi dad di mujh ko

tha lafz lafz mera sher istiara bas

thi lauh-e-dil pe ghazal meri pahle se maujud

ek ek sher ko qirtas par utra bas

nazar mein koi bhi taswir thi nahin maujud

KHuda ko main ne namazon mein hai pukara bas

wahi to ek sami-o-basir hai 'danish'

musibaton mein usi ko sada pukara bas