wahi hain qatl-o-ghaarat aur wahi kohram hai saqi

vahī haiñ qatl-o-ġhārat aur vahī kohrām hai saaqī

tamaddun aur maz.hab kī ye ḳhūnī shaam hai saaqī

kalām-e-fan mirā ab tak nihāñ hai aise duniyā se

ki jyuuñ abdulha.ī meñ ik alif gumnām hai saaqī

merī gañg-o-jaman tahzīb kī duḳhtar hai ye urdu

ise muslim banāne kī ye sāzish aam hai saaqī

kareñge amn kī bāteñ diloñ meñ buġhz rakkheñge

yahī rasm-e-jahāñ aur fitrat-e-aqvām hai saaqī

qad-a-shā.ir ke badle dekhiye me.ayār sheroñ kā

faqat itnā mirī ġhazloñ kā ye paiġhām hai saaqī

arūz-o-ilm kī ta.alīm mujh ko kab rahī hāsil

mirā ustād to bas ye ġham-e-ayyām hai saaqī

vahī ġhālib hai ab to jo ḳharīde shohrateñ apnī

rubā.ī bechne vaalā umar-'ḳhayyām' hai saaqī

ye ġhazleñ ġhaib se nāzil nahīñ ashkoñ kā hāsil haiñ

mirā ye dard hī sab se baḌā ilhām hai saaqī

wahi hain qatl-o-ghaarat aur wahi kohram hai saqi

tamaddun aur mazhab ki ye KHuni sham hai saqi

kalam-e-fan mera ab tak nihan hai aise duniya se

ki jyun abdulhai mein ek alif gumnam hai saqi

meri gang-o-jaman tahzib ki duKHtar hai ye urdu

ise muslim banane ki ye sazish aam hai saqi

karenge amn ki baaten dilon mein bughz rakkhenge

yahi rasm-e-jahan aur fitrat-e-aqwam hai saqi

qad-a-shair ke badle dekhiye meayar sheron ka

faqat itna meri ghazlon ka ye paigham hai saqi

aruz-o-ilm ki talim mujh ko kab rahi hasil

mera ustad to bas ye gham-e-ayyam hai saqi

wahi ghaalib hai ab to jo KHaride shohraten apni

rubai bechne wala umar-'KHayyam' hai saqi

ye ghazlen ghaib se nazil nahin ashkon ka hasil hain

mera ye dard hi sab se baDa ilham hai saqi