wahi hum hain aur wahi soz-e-gham wahi subh aur wahi sham hai

vahī ham haiñ aur vahī soz-e-ġham vahī sub.h aur vahī shaam hai

magar aah un ko ye kyā huā na salām hai na payām hai

na vo shikve haiñ na shikāyateñ na vo qisse haiñ na hikāyateñ

na vo lutf-e-guft-o-shunīd hai na vo jalva-e-lab-e-bām hai

hai udaas mahfil-e-mai-kashī na vo mastiyāñ na vo sarḳhushī

na nashāt-e-naġhma-o-sāz hai na surūr-e-bāda-o-jām hai

hue inqilāb hazār-hā falak-o-zamīñ meñ par aaj tak

mire dil meñ terī hī yaad hai mire lab pe terā hī naam hai

mirā un kā kyā hai muqābla maiñ ḳhizāñ huuñ aur vo bahār haiñ

unheñ jām-e-aish halāl hai mujhe ḳhvāb-e-aish harām hai

na huā visāl nasīb agar to mujhe zarā bhī gila nahīñ

tire ġham kī umr darāz ho ki isī meñ lutf-e-davām hai

tirā dast-e-shauq pahuñch sake kabhī un ke dāman-e-nāz tak

ye nasīb tere kahāñ 'valī' ye tirā taḳhayyul-e-ḳhām hai

wahi hum hain aur wahi soz-e-gham wahi subh aur wahi sham hai

magar aah un ko ye kya hua na salam hai na payam hai

na wo shikwe hain na shikayaten na wo qisse hain na hikayaten

na wo lutf-e-guft-o-shunid hai na wo jalwa-e-lab-e-baam hai

hai udas mahfil-e-mai-kashi na wo mastiyan na wo sarKHushi

na nashat-e-naghma-o-saz hai na surur-e-baada-o-jam hai

hue inqilab hazar-ha falak-o-zamin mein par aaj tak

mere dil mein teri hi yaad hai mere lab pe tera hi nam hai

mera un ka kya hai muqabla main KHizan hun aur wo bahaar hain

unhen jam-e-aish halal hai mujhe KHwab-e-aish haram hai

na hua visal nasib agar to mujhe zara bhi gila nahin

tere gham ki umr daraaz ho ki isi mein lutf-e-dawam hai

tera dast-e-shauq pahunch sake kabhi un ke daman-e-naz tak

ye nasib tere kahan 'wali' ye tera taKHayyul-e-KHam hai