wahi hasraten wahi aarzu meri zindagi mein KHushi nahin

vahī hasrateñ vahī aarzū mirī zindagī meñ ḳhushī nahīñ

tirī chashm-e-nāz ko kyā kahūñ mire soz-e-ġham meñ kamī nahīñ

na nasīm hai na bahār hai na guloñ meñ ab hai shaguftagī

hai udāsiyoñ kā ajab samāñ ki kisī ke lab pe hañsī nahīñ

maiñ huuñ mushkiloñ meñ ghirā huā tire dar se duur paḌā huā

tirī yaad se huuñ zarūr ḳhush koī aur vaj.h-e-ḳhushī nahīñ

vo nigāh-e-nāz se aag jo mire dil meñ tum ne lagā.ī thī

vo dabī dabī sī zarūr hai magar aaj tak vo bujhī nahīñ

na vo garmiyāñ na vo mastiyāñ na vo soz-o-sāz hai sāqiyā

tire mai-kade meñ mire liye kisī shai meñ jalvagarī nahīñ

maiñ vo andalīb-e-bahār huuñ jise bāġhbāñ ne miTā diyā

maiñ vo gulistān-e-hayāt huuñ ki shagufta koī kalī nahīñ

hai kahāñ vo 'aslam'-e-ḳhush-navā jo rahīn-e-aish-o-nishāt thā

tire ġham ne us ko miTā diyā ki ḳhushī se us ko ḳhushī nahīñ

wahi hasraten wahi aarzu meri zindagi mein KHushi nahin

teri chashm-e-naz ko kya kahun mere soz-e-gham mein kami nahin

na nasim hai na bahaar hai na gulon mein ab hai shaguftagi

hai udasiyon ka ajab saman ki kisi ke lab pe hansi nahin

main hun mushkilon mein ghira hua tere dar se dur paDa hua

teri yaad se hun zarur KHush koi aur wajh-e-KHushi nahin

wo nigah-e-naz se aag jo mere dil mein tum ne lagai thi

wo dabi dabi si zarur hai magar aaj tak wo bujhi nahin

na wo garmiyan na wo mastiyan na wo soz-o-saz hai saqiya

tere mai-kade mein mere liye kisi shai mein jalwagari nahin

main wo andalib-e-bahaar hun jise baghban ne miTa diya

main wo gulistan-e-hayat hun ki shagufta koi kali nahin

hai kahan wo 'aslam'-e-KHush-nawa jo rahin-e-aish-o-nishat tha

tere gham ne us ko miTa diya ki KHushi se us ko KHushi nahin