wahi jhuki hui belen wahi daricha tha

vahī jhukī huī beleñ vahī darīcha thā

magar vo phuul sā chehra nazar na aatā thā

maiñ lauT aayā huuñ ḳhāmoshiyoñ ke sahrā se

vahāñ bhī terī sadā kā ġhubār phailā thā

shab-e-safar thī qabā tīrgī kī pahne hue

kahīñ kahīñ pe koī raushnī kā dhabbā thā

ye āḌī-tirchhī lakīreñ banā gayā hai kaun

maiñ kyā kahūñ mire dil kā varaq to saadā thā

maiñ ḳhāk-dāñ se nikal kar bhī kyā huā āzād

har ik taraf se mujhe āsmāñ ne gherā thā

idhar se bār-hā guzrā magar ḳhabar na huī

ki zer-e-sañg ḳhunuk pāniyoñ kā chashma thā

vo us kā aks-e-badan thā ki chāñdnī kā kañval

vo niilī jhiil thī yā āsmāñ kā TukḌā thā

maiñ sāhiloñ meñ utar kar 'shakeb' kyā letā

azal se naam mirā pāniyoñ pe likkhā thā

wahi jhuki hui belen wahi daricha tha

magar wo phul sa chehra nazar na aata tha

main lauT aaya hun KHamoshiyon ke sahra se

wahan bhi teri sada ka ghubar phaila tha

shab-e-safar thi qaba tirgi ki pahne hue

kahin kahin pe koi raushni ka dhabba tha

ye aaDi-tirchhi lakiren bana gaya hai kaun

main kya kahun mere dil ka waraq to sada tha

main KHak-dan se nikal kar bhi kya hua aazad

har ek taraf se mujhe aasman ne ghera tha

idhar se bar-ha guzra magar KHabar na hui

ki zer-e-sang KHunuk paniyon ka chashma tha

wo us ka aks-e-badan tha ki chandni ka kanwal

wo nili jhil thi ya aasman ka TukDa tha

main sahilon mein utar kar 'shakeb' kya leta

azal se nam mera paniyon pe likkha tha