wahi josh-e-haq-shanasi wahi azm-burd-bari

vahī josh-e-haq-shanāsī vahī azm-burd-bārī

na badal sakā zamāna mirī ḳhū-e-vaza-dārī

vahī mai-kada hai lekin nahīñ ab vo kaif-bārī

ga.e ham mazāq le ke mirā lutf-e-bāda-ḳhvārī

ho zabān jis ke muñh meñ vo na aa.e anjuman meñ

kahīñ rakh na de sitam-gar yahī shart-e-rāz-dārī

kabhī hañste hañste ronā kabhī rote rote hañsnā

koī kyā samajh sakegā bhalā maslahat hamārī

maiñ zamāne bhar ke ta.ane na ḳhamosh ho ke suntā

jo junūn-e-ishq hotā mirā fe.al-e-iḳhtiyārī

mai-e-āshiqī se tauba hai junūn-e-pārsā.ī

kahīñ le na Duube vaa.iz tujhe zo.am-e-hoshiyārī

na pahuñch sakā jahāñ tak kabhī pā-e-kibr-o-dānish

vahīñ 'jurm' le ga.ī hai mujhe merī ḳhāksārī

wahi josh-e-haq-shanasi wahi azm-burd-bari

na badal saka zamana meri KHu-e-waza-dari

wahi mai-kada hai lekin nahin ab wo kaif-bari

gae hum mazaq le ke mera lutf-e-baada-KHwari

ho zaban jis ke munh mein wo na aae anjuman mein

kahin rakh na de sitam-gar yahi shart-e-raaz-dari

kabhi hanste hanste rona kabhi rote rote hansna

koi kya samajh sakega bhala maslahat hamari

main zamane bhar ke tane na KHamosh ho ke sunta

jo junun-e-ishq hota mera feal-e-iKHtiyari

mai-e-ashiqi se tauba hai junun-e-parsai

kahin le na Dube waiz tujhe zoam-e-hoshiyari

na pahunch saka jahan tak kabhi pa-e-kibr-o-danish

wahin 'jurm' le gai hai mujhe meri KHaksari