wahi kaun-o-makan apna mata-e-zindagi apni

vahī kaun-o-makāñ apnā matā-e-zindagī apnī

jahāñ tak le ke jaatī hai mujhe āvārgī apnī

agar rusvā.iyoñ tak baat hotī to ġhanīmat thī

tamāshā ban ga.ī hai aaj har-sū zindagī apnī

palaT kar maiñ ne dobāra kabhī vo dar nahīñ dekhā

jahāñ rusvā hui ik baar bhī dīvāngī apnī

muqābil hai mire fitna-girī ab to ḳhudā jaane

kahāñ tak saath detī hai mirā shā.istagī apnī

isī ummīd par āñkheñ dar-e-jānāñ ko chūme haiñ

ki ik din rañg lā.egī adā-e-bandagī apnī

chalan mā'lūm hai duniyā kā mujh ko bhī magar 'tashna'

mujhe ḳhāmosh kar detī hai aksar sādgī apnī

wahi kaun-o-makan apna mata-e-zindagi apni

jahan tak le ke jati hai mujhe aawargi apni

agar ruswaiyon tak baat hoti to ghanimat thi

tamasha ban gai hai aaj har-su zindagi apni

palaT kar main ne dobara kabhi wo dar nahin dekha

jahan ruswa hui ek bar bhi diwangi apni

muqabil hai mere fitna-giri ab to KHuda jaane

kahan tak sath deti hai mera shaistagi apni

isi ummid par aankhen dar-e-jaanan ko chume hain

ki ek din rang laegi ada-e-bandagi apni

chalan ma'lum hai duniya ka mujh ko bhi magar 'tashna'

mujhe KHamosh kar deti hai aksar sadgi apni