wahi musafir musafirat ka mujhe qarina sikha raha tha

vahī musāfir musāfirat kā mujhe qarīna sikhā rahā thā

jo apnī chhāgal se apne ghoḌe ko aap paanī pilā rahā thā

dukhoñ ke gaare meñ haath lithḌe hue the mere hunar ke lekin

maiñ rote rote bhī muskurātā huā koī but banā rahā thā

kuchh is liye bhī mirī sadā par har ik samā.at ko thā bharosa

gumāñ ke sahrā meñ baiTh kar maiñ yaqīn ke giit gā rahā thā

sunā hai kal raat mar gayā vo barahna darvesh jhoñpaḌī meñ

fanā ke bistar pe jo baqā kī harīs gudḌī bichhā rahā thā

mirī nazar meñ vo tifl masjid ke peshvā se bhī mohtaram hai

jo ehtirāman galī se gandum ke bikhre daane uThā rahā thā

bahut muqaddas the us sipāhī kī donoñ āñkhoñ ke surḳh Dore

jo soī maḳhlūq kī hifāzat meñ ḳhvāb apne gañvā rahā thā

tamām shab us ke bhūke bachchoñ ne jaag kar hī guzār dī thī

ḳhudī ke fōtpath par jo ġhurbat thapak thapak kar sulā rahā thā

vo merī barsī pe merī mayyat ke naam shām-e-ġhazal thī 'vāsif'

maiñ apnī turbat meñ leTe leTe kalām sab ko sunā rahā thā

wahi musafir musafirat ka mujhe qarina sikha raha tha

jo apni chhagal se apne ghoDe ko aap pani pila raha tha

dukhon ke gare mein hath lithDe hue the mere hunar ke lekin

main rote rote bhi muskuraata hua koi but bana raha tha

kuchh is liye bhi meri sada par har ek samaat ko tha bharosa

guman ke sahra mein baiTh kar main yaqin ke git ga raha tha

suna hai kal raat mar gaya wo barahna darwesh jhonpaDi mein

fana ke bistar pe jo baqa ki haris gudDi bichha raha tha

meri nazar mein wo tifl masjid ke peshwa se bhi mohtaram hai

jo ehtiraman gali se gandum ke bikhre dane uTha raha tha

bahut muqaddas the us sipahi ki donon aankhon ke surKH Dore

jo soi maKHluq ki hifazat mein KHwab apne ganwa raha tha

tamam shab us ke bhuke bachchon ne jag kar hi guzar di thi

KHudi ke footpath par jo ghurbat thapak thapak kar sula raha tha

wo meri barsi pe meri mayyat ke nam sham-e-ghazal thi 'wasif'

main apni turbat mein leTe leTe kalam sab ko suna raha tha