wahi na-saburi-e-arzu wahi naqsh-e-pa wahi jada hai

vahī nā-sabūrī-e-ārzū vahī naqsh-e-pā vahī jaada hai

koī sañg-e-rah ko ḳhabar karo usī āstāñ kā irāda hai

vahī ashk-e-ḳhūñ ke gulāb haiñ vahī ḳhaar ḳhaar hai pairahan

na karam kī aas bujhī abhī na sitam kī dhuup ziyāda hai

abhī raushnī kī lakīr sī sar-e-rahguzār hai jāñ-ba-lab

kisī dil kī aas miTī nahīñ kahīñ ik darīcha kushāda hai

tan-e-zaḳhm zaḳhm ko chhoḌ de mire chāragar mire mehrbāñ

dil-e-dāġh daaġh kā hausla tirī marhamat se ziyāda hai

jo nazar bachā ke guzar ga.e to na aa sakoge palaT ke tum

baḌī mohtaram hai ye bebasī ki ḳhulūs-e-jāñ kā libāda hai

yahī zindagī hai burī-bhalī ye kashīda sar ye barahna-pā

na ġhubār-e-rāh se muzmahil na sukūn-e-jāñ kā i.aada hai

mirā iftiḳhār vafā talak mujhe raas aa na sakā 'adā'

tirā naam jis pe likhā rahā vo kitāb aaj bhī saada hai

wahi na-saburi-e-arzu wahi naqsh-e-pa wahi jada hai

koi sang-e-rah ko KHabar karo usi aastan ka irada hai

wahi ashk-e-KHun ke gulab hain wahi KHar KHar hai pairahan

na karam ki aas bujhi abhi na sitam ki dhup ziyaada hai

abhi raushni ki lakir si sar-e-rahguzar hai jaan-ba-lab

kisi dil ki aas miTi nahin kahin ek daricha kushada hai

tan-e-zaKHm zaKHm ko chhoD de mere chaaragar mere mehrban

dil-e-dagh dagh ka hausla teri marhamat se ziyaada hai

jo nazar bacha ke guzar gae to na aa sakoge palaT ke tum

baDi mohtaram hai ye bebasi ki KHulus-e-jaan ka libaada hai

yahi zindagi hai buri-bhali ye kashida sar ye barahna-pa

na ghubar-e-rah se muzmahil na sukun-e-jaan ka iada hai

mera iftiKHar wafa talak mujhe ras aa na saka 'ada'

tera nam jis pe likha raha wo kitab aaj bhi sada hai