wahi rahta hai sab lekin zamana chhuT jata hai

vahī rahtā hai sab lekin zamāna chhūT jaatā hai

parī sī beTiyoñ kā muskurānā chhūT jaatā hai

adhūrā zindagī kā har fasāna chhūT jaatā hai

vo chiḌiyoñ sā phudaknā chahchahānā chhūT jaatā hai

jadīdī daur meñ bhī hai qadīmī beTī kī qismat

judā hote hī bachpan se gharānā chhūT jaatā hai

jo kal tak ghar thā beTī kā huā hai mā.ika ab vo

zarā sī rasm se hī āshiyānā chhūT jaatā hai

agar maañ ThanDī roTī deñ to ham nārāz hote haiñ

magar sasurāl jā kar garm khānā chhūT jaatā hai

koī baġhiyā samar ke bin rahe suunī na is ḳhātir

shajar baabā ke āñgan kā purānā chhūT jaatā hai

muhayyā aish-o-ishrat kā asāsa hai hameñ yuuñ to

magar is meñ khilaunoñ kā ḳhazāna chhūT jaatā hai

raheñ māñ-bāp jab tak pūchhī jaatī hai har ik beTī

phir apne gaañv us kā ānā-jānā chhūT jaatā hai

jahāñ kī saarī zimmedāriyāñ haiñ munhasir ham par

na chhūTe kaam ham se bas kamānā chhūT jaatā hai

zarā se dil meñ rakhne paḌte haiñ parvat se ġham ham ko

zarā sī baat par aañsū bahānā chhūT jaatā hai

yahāñ ik 'ārzū' ko gul kī nik.hat sā banāne meñ

hazāroñ ḳhvāb kā mausam suhānā chhūT jaatā hai

wahi rahta hai sab lekin zamana chhuT jata hai

pari si beTiyon ka muskurana chhuT jata hai

adhura zindagi ka har fasana chhuT jata hai

wo chiDiyon sa phudakna chahchahana chhuT jata hai

jadidi daur mein bhi hai qadimi beTi ki qismat

juda hote hi bachpan se gharana chhuT jata hai

jo kal tak ghar tha beTi ka hua hai maika ab wo

zara si rasm se hi aashiyana chhuT jata hai

agar man ThanDi roTi den to hum naraaz hote hain

magar sasural ja kar garm khana chhuT jata hai

koi baghiya samar ke bin rahe suni na is KHatir

shajar baba ke aangan ka purana chhuT jata hai

muhayya aish-o-ishrat ka asasa hai hamein yun to

magar is mein khilaunon ka KHazana chhuT jata hai

rahen man-bap jab tak puchhi jati hai har ek beTi

phir apne ganw us ka aana-jaana chhuT jata hai

jahan ki sari zimmedariyan hain munhasir hum par

na chhuTe kaam hum se bas kamana chhuT jata hai

zara se dil mein rakhne paDte hain parwat se gham hum ko

zara si baat par aansu bahana chhuT jata hai

yahan ek 'arzu' ko gul ki nikhat sa banane mein

hazaron KHwab ka mausam suhana chhuT jata hai