wahi saghar wahi sahba wahi mai-KHwar hain saqi

vahī sāġhar vahī sahbā vahī mai-ḳhvār haiñ saaqī

nizām-e-nau ke kyā sach-much yahī āsār haiñ saaqī

ḳhulūs-e-dil hai yā kuchh be-asar ash.ār haiñ saaqī

kareñ kyā nazr terī muflis-o-nādār haiñ saaqī

nigāh-e-nāz kī mastī se jo sarshār haiñ saaqī

vo dīvāne haqīqat meñ bahut hushiyār haiñ saaqī

pilā vo jaam jis se mushkileñ āsān ho jaa.eñ

marāhil rāh-e-ulfat ke bahut dushvār haiñ saaqī

likhā dīvār kā paḌh le ḳhamoshī kī sadā sun le

badalte daur ke mub.ham se ye āsār haiñ saaqī

jo kahtī thiiñ ki ik din diid se sarshār kar deñgī

vahī āñkheñ bil-āḳhir māne-e-dīdār haiñ saaqī

bahut karte haiñ karne ko to da.ave jāñ-nisārī kā

jo tujh par jaan dete haiñ faqat do-chār haiñ saaqī

ajab mahfil hai ye mahfil ajab aalam hai ye aalam

na ham majbūr haiñ saaqī na ham muḳhtār haiñ saaqī

terī baḳhshish kā ye andāz kyā hai kuchh nahīñ khultā

jo haiñ ahl-e-hunar vo log hī nādār haiñ saaqī

lagī dil kī bujhāne ko lipaT jaate haiñ shāloñ se

ye parvāne kahāñ ke paikar-e-īsār haiñ saaqī

jo hote haiñ asīr-e-jām vo mai-kash nahīñ hote

raheñ jo be-piye sarshār vo mai-ḳhvār haiñ saaqī

wahi saghar wahi sahba wahi mai-KHwar hain saqi

nizam-e-nau ke kya sach-much yahi aasar hain saqi

KHulus-e-dil hai ya kuchh be-asar ashaar hain saqi

karen kya nazr teri muflis-o-nadar hain saqi

nigah-e-naz ki masti se jo sarshaar hain saqi

wo diwane haqiqat mein bahut hushiyar hain saqi

pila wo jam jis se mushkilen aasan ho jaen

marahil rah-e-ulfat ke bahut dushwar hain saqi

likha diwar ka paDh le KHamoshi ki sada sun le

badalte daur ke mubham se ye aasar hain saqi

jo kahti thin ki ek din did se sarshaar kar dengi

wahi aankhen bil-aKHir mane-e-didar hain saqi

bahut karte hain karne ko to dawe jaan-nisari ka

jo tujh par jaan dete hain faqat do-chaar hain saqi

ajab mahfil hai ye mahfil ajab aalam hai ye aalam

na hum majbur hain saqi na hum muKHtar hain saqi

teri baKHshish ka ye andaz kya hai kuchh nahin khulta

jo hain ahl-e-hunar wo log hi nadar hain saqi

lagi dil ki bujhane ko lipaT jate hain shaalon se

ye parwane kahan ke paikar-e-isar hain saqi

jo hote hain asir-e-jam wo mai-kash nahin hote

rahen jo be-piye sarshaar wo mai-KHwar hain saqi