wahi shikast-e-safar ka nishan hai chehre par

vahī shikast-e-safar kā nishāñ hai chehre par

bahut ġhubār-e-pas-e-kārvāñ hai chehre par

nazar uThe bhī to zaḳhmoñ kī taab lā na sake

ye aa.ina hai ki ḳhanjar ravāñ hai chehre par

ḳhayāl-o-ḳhvāb ke tājir zabāñ se kuchh na kaheñ

likhī tamām kitāb-e-ziyāñ hai chehre pur

ummīd-o-bīm kī ik fasl-e-rā.egāñ huuñ maiñ

nazar meñ phuul khile haiñ ḳhizāñ hai chehre par

malāl-e-jāñ kī haqīqat ko kyā chhupā.ūñ maiñ

ki harf harf vahī dāstāñ hai chehre par

chalo ki uzr-e-sitam kī bhī qaid ḳhatm huī

jo ik naqāb thā vo bhī kahāñ hai chehre par

phir us ke baad bhī shāyad havā chalī hogī

jo gard uḌ ke paḌī thī kahāñ hai chehre par

chhalak rahī hai dil-o-jāñ kī raushnī 'qaisar'

bujhī-bujhī hī sahī mehrbāñ hai chehre par

wahi shikast-e-safar ka nishan hai chehre par

bahut ghubar-e-pas-e-karwan hai chehre par

nazar uThe bhi to zaKHmon ki tab la na sake

ye aaina hai ki KHanjar rawan hai chehre par

KHayal-o-KHwab ke tajir zaban se kuchh na kahen

likhi tamam kitab-e-ziyan hai chehre pur

ummid-o-bim ki ek fasl-e-raegan hun main

nazar mein phul khile hain KHizan hai chehre par

malal-e-jaan ki haqiqat ko kya chhupaun main

ki harf harf wahi dastan hai chehre par

chalo ki uzr-e-sitam ki bhi qaid KHatm hui

jo ek naqab tha wo bhi kahan hai chehre par

phir us ke baad bhi shayad hawa chali hogi

jo gard uD ke paDi thi kahan hai chehre par

chhalak rahi hai dil-o-jaan ki raushni 'qaisar'

bujhi-bujhi hi sahi mehrban hai chehre par