wahi sitara shab-e-gham ka ek sitara hai

vahī sitāra shab-e-ġham kā ik sitāra hai

vo ik sitāra jo chashm-e-sahar meñ rahtā hai

khulī fazā kā payāmī havā kā baasī hai

kahāñ vo halqa-e-dīvār-o-dar meñ rahtā hai

jo mere hoñToñ pe aa.e to gungunā.ūñ use

vo sher ban ke bayāz-e-nazar meñ rahtā hai

guzartā vaqt mirā ġham-gusār kyā hogā

ye ḳhud ta.āqub-e-shām-o-sahar meñ rahtā hai

mirā hī ruup hai tū ġhaur se agar dekhe

bagūla sā jo tirī rahguzar meñ rahtā hai

na jaane kaun hai jis kī talāsh meñ 'bismil'

har ek saañs mirā ab safar meñ rahtā hai

wahi sitara shab-e-gham ka ek sitara hai

wo ek sitara jo chashm-e-sahar mein rahta hai

khuli faza ka payami hawa ka basi hai

kahan wo halqa-e-diwar-o-dar mein rahta hai

jo mere honTon pe aae to gungunaun use

wo sher ban ke bayaz-e-nazar mein rahta hai

guzarta waqt mera gham-gusar kya hoga

ye KHud taaqub-e-sham-o-sahar mein rahta hai

mera hi rup hai tu ghaur se agar dekhe

bagula sa jo teri rahguzar mein rahta hai

na jaane kaun hai jis ki talash mein 'bismil'

har ek sans mera ab safar mein rahta hai