wahi zamana wahi mah-o-sal oDhe hain

vahī zamāna vahī māh-o-sāl oḌhe haiñ

bahut dinoñ se tumhārā ḳhayāl oḌhe haiñ

shuā-e-mahr ne mujh se kahā ba-vaqt-e-shām

uruuj vaale yahāñ sab zavāl oḌhe haiñ

adab se baiThiye aa kar ke ham faqīroñ meñ

yahāñ ke TāT-nashīñ sab kamāl oḌhe haiñ

sajā.e baiThe haiñ vo tohmateñ zabānoñ par

aur ek ham haiñ ki ab tak misāl oḌhe haiñ

ḳhudā bachā.e unheñ january kī ThanDak se

jo shīt-lahrī ġharīboñ ke laal oḌhe haiñ

unheñ maiñ qaum kā qaa.id to kah nahīñ saktā

vo bheḌiye haiñ jo bheḌoñ kī khaal oḌhe haiñ

hamāre naam na maazī na koī mustaqbil

ham apnī hālat-e-ḳhasta pe haal oḌhe haiñ

phaTī qamīz dikhā.ī na de kahīñ 'qaisar'

isī liye to ye rangīn shaal oḌhe haiñ

wahi zamana wahi mah-o-sal oDhe hain

bahut dinon se tumhaara KHayal oDhe hain

shua-e-mahr ne mujh se kaha ba-waqt-e-sham

uruj wale yahan sab zawal oDhe hain

adab se baiThiye aa kar ke hum faqiron mein

yahan ke TaT-nashin sab kamal oDhe hain

sajae baiThe hain wo tohmaten zabanon par

aur ek hum hain ki ab tak misal oDhe hain

KHuda bachae unhen january ki ThanDak se

jo shit-lahri gharibon ke lal oDhe hain

unhen main qaum ka qaid to kah nahin sakta

wo bheDiye hain jo bheDon ki khaal oDhe hain

hamare nam na mazi na koi mustaqbil

hum apni haalat-e-KHasta pe haal oDhe hain

phaTi qamiz dikhai na de kahin 'qaisar'

isi liye to ye rangin shaal oDhe hain