وہی زمین وہی سر پہ آسماں نکلا

وہی زمین وہی سر پہ آسماں نکلا

سفر کے پار بھی اک دشت رائیگاں نکلا

جو اس کو دیکھا تو تصویر بن گئیں آنکھیں

یہ جاگتا ہوا پل خواب بے کراں نکلا

رواں تھے ہم تو سفر پر چراغ ہوش لیے

مگر ثبات جہاں کار ناگہاں نکلا

اڑی قبائے سکندر غبار نسیاں میں

طلوع ساغر جم شعلۂ گماں نکلا

کہیں تھا شور تکلم کہیں تھی خاموشی

جو ہم کلام تھا ہم سے وہ درمیاں نکلا

اسے چھوا تو وہ گم ہو گیا ہوا کی طرح

عجب نظارہ تھا ظاہر میں بھی نہاں نکلا

فسون عشق قمار ہوس گری ٹھہرا

تمام گریہ جاں زیب داستاں نکلا

کہیں ہے دشت‌ ہلاکت کہیں ہے حیرانی

تری تلاش میں یہ راستہ کہاں نکلا

بس اک گلیم سخن دوش عمر تھی سرمدؔ

اسی کے تار شکستہ سے لعل جاں نکلا