wahin hain dil ke qarain tamam kahte hain

vahīñ haiñ dil ke qarā.in tamām kahte haiñ

vo ik ḳhalish ki jise terā naam kahte haiñ

tum aa rahe ho ki bajtī haiñ merī zanjīreñ

na jaane kyā mire dīvār-o-bām kahte haiñ

yahī kanār-e-falak kā siyah-tarīñ gosha

yahī hai matla-e-māh-e-tamām kahte haiñ

piyo ki muft lagā dī hai ḳhūn-e-dil kī kashīd

girāñ hai ab ke mai-e-lāla-fām kahte haiñ

faqīh-e-shahr se mai kā javāz kyā pūchheñ

ki chāñdnī ko bhī hazrat harām kahte haiñ

navā-e-murġh ko kahte haiñ ab ziyān-e-chaman

khile na phuul ise intizām kahte haiñ

kaho to ham bhī chaleñ 'faiz' ab nahīñ sar-e-dār

vo farq-e-martaba-e-ḳhās-o-ām kahte haiñ

wahin hain dil ke qarain tamam kahte hain

wo ek KHalish ki jise tera nam kahte hain

tum aa rahe ho ki bajti hain meri zanjiren

na jaane kya mere diwar-o-baam kahte hain

yahi kanar-e-falak ka siyah-tarin gosha

yahi hai matla-e-mah-e-tamam kahte hain

piyo ki muft laga di hai KHun-e-dil ki kashid

giran hai ab ke mai-e-lala-fam kahte hain

faqih-e-shahr se mai ka jawaz kya puchhen

ki chandni ko bhi hazrat haram kahte hain

nawa-e-murgh ko kahte hain ab ziyan-e-chaman

khile na phul ise intizam kahte hain

kaho to hum bhi chalen 'faiz' ab nahin sar-e-dar

wo farq-e-martaba-e-KHas-o-am kahte hain