وہیں رکے ہیں جہاں موڑ داستان کا تھا

وہیں رکے ہیں جہاں موڑ داستان کا تھا

وہ فاصلہ ہی رہا ہے جو درمیان کا تھا

اسی دیار میں ہم نے بھی دن گزارے ہیں

خیال سب کو جہاں اپنی آن بان کا تھا

ہمارے پاؤں کے نیچے زمین ایسی تھی

قدم قدم پہ گماں جس پہ آسمان کا تھا

اسی لیے تو لہو رو کے بھی ہنسی آئی

میں جانتا ہوں کہ وہ تیر کس کمان کا تھا

ادھر بھی آئے تھے ارجن کے بان کی صورت

سمجھ لیا ہے اشارہ جو مہربان كا تھا

چمن میں غنچہ و گل کی شگفتگی دیکھی

پھر اس کے بعد جو کھلنا مری زبان کا تھا

نگار صبح کے ہم راہ بن سنور کے گیا

وہ رہنے والا جو اجڑے ہوئے مکان کا تھا

ہماری ہمتیں اقبالؔ ہم کو لے آئیں

ادھر تو رخ نہ ہوا کا نہ بادبان کا تھا