wahin ruke hain jahan moD dastan ka tha

vahīñ ruke haiñ jahāñ moḌ dāstān kā thā

vo fāsla hī rahā hai jo darmiyān kā thā

usī dayār meñ ham ne bhī din guzāre haiñ

ḳhayāl sab ko jahāñ apnī ān-bān kā thā

hamāre paañv ke nīche zamīn aisī thī

qadam-qadam pe gumāñ jis pe āsmān kā thā

isī liye to lahū ro ke bhī hañsī aa.ī

maiñ jāntā huuñ ki vo tiir kis kamān kā thā

idhar bhī aa.e the arjun ke baan kī sūrat

samajh liyā hai ishāra jo mehrbān kā thā

chaman meñ ġhuncha-o-gul kī shaguftagī dekhī

phir us ke baa'd jo khulnā mirī zabān kā thā

nigār-e-sub.h ke hamrāh ban-sañvar ke gayā

vo rahne vaalā jo ujḌe hue makān kā thā

hamārī himmateñ 'iqbāl' ham ko le aa.iiñ

idhar to ruḳh na havā kā na bādbān kā thā

wahin ruke hain jahan moD dastan ka tha

wo fasla hi raha hai jo darmiyan ka tha

usi dayar mein hum ne bhi din guzare hain

KHayal sab ko jahan apni aan-ban ka tha

hamare panw ke niche zamin aisi thi

qadam-qadam pe guman jis pe aasman ka tha

isi liye to lahu ro ke bhi hansi aai

main jaanta hun ki wo tir kis kaman ka tha

idhar bhi aae the arjun ke ban ki surat

samajh liya hai ishaara jo mehrban ka tha

chaman mein ghuncha-o-gul ki shaguftagi dekhi

phir us ke ba'd jo khulna meri zaban ka tha

nigar-e-subh ke hamrah ban-sanwar ke gaya

wo rahne wala jo ujDe hue makan ka tha

hamari himmaten 'iqbaal' hum ko le aain

idhar to ruKH na hawa ka na baadban ka tha