wahin se jab ki ishaara ho KHud-numai ka

vahīñ se jab ki ishāra ho ḳhud-numā.ī kā

ajab ki banda na dā'vā kare ḳhudā.ī kā

mile jo rutba tire dar kī jab.ha-sā.ī kā

to ek silsila ho shāhī-o-gadā.ī kā

nahīñ hai faiz meñ ḳhissat va-lek paidā hai

tafāvut ā.ina-o-sañg meñ safā.ī kā

yahāñ jo 'ishq hai betāb-e-jalva-e-dīdār

vahāñ bhī husn muharrik hai ḳhud-numā.ī kā

butoñ ke sāmne but-gar ghise jabīn-e-niyāz

maiñ shefta huuñ tirī shān-e-kibriyā.ī kā

na kar kisī kī burā.ī na ban bhale se burā

bhalā bhalā hai burā kaam hai burā.ī kā

banā.eñ bigḌī huī ko to ek baat bhī hai

bigāḌnā nahīñ mushkil banī-banā.ī kā

uThā hijāb to bas dīn-o-dil diye hī banī

janāb-e-shaiḳh ko dā'vā thā pārsā.ī kā

tumhāre dil se kudūrat miTā.e to jāneñ

khulā hai shahr meñ ik mahkama safā.ī kā

havas hai gar sar-o-sāmāñ ke jam.a karne kī

talāsh kar sar-o-sāmān be-navā.ī kā

sivā.e 'ishq nahīñ koī rahbar-e-chālāk

vahāñ ḳhirad ko nahīñ hausla rasā.ī kā

usī kā vasf hai maqsūd she'r-ḳhvānī se

usī kā zikr hai manshā ġhazal-sarā.ī kā

nahīñ hai ab ke zamāne kī ye ravish zinhār

maiñ yādgār huuñ 'ḳhāqānī'-o-'sanā.ī' kā

wahin se jab ki ishaara ho KHud-numai ka

ajab ki banda na da'wa kare KHudai ka

mile jo rutba tere dar ki jabha-sai ka

to ek silsila ho shahi-o-gadai ka

nahin hai faiz mein KHissat wa-lek paida hai

tafawut aaina-o-sang mein safai ka

yahan jo 'ishq hai betab-e-jalwa-e-didar

wahan bhi husn muharrik hai KHud-numai ka

buton ke samne but-gar ghise jabin-e-niyaz

main shefta hun teri shan-e-kibriyai ka

na kar kisi ki burai na ban bhale se bura

bhala bhala hai bura kaam hai burai ka

banaen bigDi hui ko to ek baat bhi hai

bigaDna nahin mushkil bani-banai ka

uTha hijab to bas din-o-dil diye hi bani

janab-e-shaiKH ko da'wa tha parsai ka

tumhaare dil se kudurat miTae to jaanen

khula hai shahr mein ek mahkama safai ka

hawas hai gar sar-o-saman ke jama karne ki

talash kar sar-o-saman be-nawai ka

siwae 'ishq nahin koi rahbar-e-chaalak

wahan KHirad ko nahin hausla rasai ka

usi ka wasf hai maqsud she'r-KHwani se

usi ka zikr hai mansha ghazal-sarai ka

nahin hai ab ke zamane ki ye rawish zinhaar

main yaadgar hun 'KHaqani'-o-'sanai' ka