wahm ki parchhaiyon se dil ko bahlate nahin

vahm kī parchhā.iyoñ se dil ko bahlāte nahīñ

ahl-e-dānish is fareb-e-shauq meñ aate nahīñ

muztarib rakhtī hai har lamha safar kī aarzū

ham vo raahī haiñ jo manzil par sukūñ paate nahīñ

ābgīnoñ kī tarah un kī hifāzat farz hai

TuuT jaate haiñ jo rishte phir numū paate nahīñ

chhoḌ kar ik tere dar ko dar-ba-dar jaa.eñ to kyuuñ

har kisī ke sāmne ham haath phailāte nahīñ

hausla dekhā hamārā zindagī ke shīshagar

gar na hotā azm to patthar se Takrāte nahīñ

gardish-e-daurāñ na le ham be-kasoñ kā imtihāñ

ahl-e-dil ālām kī yūrish se ghabrāte nahīñ

ai 'shabānā' ḳhār-zār-e-zindagī hai aur ham

chal paḌe jab paañv ke chhāloñ se ghabrāte nahīñ

wahm ki parchhaiyon se dil ko bahlate nahin

ahl-e-danish is fareb-e-shauq mein aate nahin

muztarib rakhti hai har lamha safar ki aarzu

hum wo rahi hain jo manzil par sukun pate nahin

aabginon ki tarah un ki hifazat farz hai

TuT jate hain jo rishte phir numu pate nahin

chhoD kar ek tere dar ko dar-ba-dar jaen to kyun

har kisi ke samne hum hath phailate nahin

hausla dekha hamara zindagi ke shishagar

gar na hota azm to patthar se Takraate nahin

gardish-e-dauran na le hum be-kason ka imtihan

ahl-e-dil aalam ki yurish se ghabraate nahin

ai 'shabana' KHar-zar-e-zindagi hai aur hum

chal paDe jab panw ke chhaalon se ghabraate nahin