wahm-o-guman ne aas bandhai tamam raat

vahm-o-gumāñ ne aas bañdhā.ī tamām raat

aahaT ḳhirām-e-nāz kī aa.ī tamām raat

majbūr ho ke maiñ ne mohabbat kī chhāñv meñ

tāroñ ko dil kī baat sunā.ī tamām raat

masrūr ho ke chāñd ne ik chāñd ke liye

kyā chāñdnī zamīñ pe bichā.ī tamām raat

khā kar taras gudāzī-e-soz-e-firāq par

ashkoñ ne dil kī aag bujhā.ī tamām raat

yaad aap kī hai aap se baḌh kar karam-navāz

aap ik ghaḌī ko aa.e vo aa.ī tamām raat

tasvīr un kī sāmne rakh kar ba-sad-alam

rūdād-e-iztirāb sunā.ī tamām raat

dar par nigāh dil meñ taḌap ruuh muztarib

taklīf-e-intizār uThā.ī tamām raat

chashm-e-'jalī' ne hasrat-e-jalva liye hue

ashkoñ se bazm-e-ishq sajā.ī tamām raat

wahm-o-guman ne aas bandhai tamam raat

aahaT KHiram-e-naz ki aai tamam raat

majbur ho ke main ne mohabbat ki chhanw mein

taron ko dil ki baat sunai tamam raat

masrur ho ke chand ne ek chand ke liye

kya chandni zamin pe bichai tamam raat

kha kar taras gudazi-e-soz-e-firaq par

ashkon ne dil ki aag bujhai tamam raat

yaad aap ki hai aap se baDh kar karam-nawaz

aap ek ghaDi ko aae wo aai tamam raat

taswir un ki samne rakh kar ba-sad-alam

rudad-e-iztirab sunai tamam raat

dar par nigah dil mein taDap ruh muztarib

taklif-e-intizar uThai tamam raat

chashm-e-'jali' ne hasrat-e-jalwa liye hue

ashkon se bazm-e-ishq sajai tamam raat