wahshat-e-asar-o-sukun soz nazaron ke siwa

vahshat-e-āsār-o-sukūñ soz nazāroñ ke sivā

aur sab kuchh hai gulistāñ meñ bahāroñ ke sivā

ab na be-bāk-nigāhī hai na gustāḳh-labī

chand sahme hue mub.ham se ishāroñ ke sivā

sāqiyā koī nahīñ mujrim-e-mai-ḳhāna yahāñ

tere kam-zarf-o-nazar bāda-gusāroñ ke sivā

hasrateñ un meñ abhī dafn haiñ insānoñ kī

naam kyā dījiye sīnoñ ko mazāroñ ke sivā

duur tak koī nahīñ hai shajar-e-sāya-dār

chand sūkhe hue peḌoñ kī qatāroñ ke sivā

aap kahte haiñ ki gulshan meñ hai arzānī-e-gul

apne dāman meñ to kuchh bhī nahīñ ḳhāroñ ke sivā

manzil-e-shauq meñ ik ik ko diyā izn-e-safar

koī bhī to na milā jāda-shumāroñ ke sivā

zor-e-tūfāñ to ba-har-hāl hai zor-e-tūfāñ

kis se Takrā.egī mauj apnī kināroñ ke sivā

kaun is daur ke insāñ kā muqaddar bantā

chand āvāra-o-manhūs sitāroñ ke sivā

kitne qadmoñ kī ḳharāshoñ se lahū ristā hai

kis ko ma.alūm hai ye rāh-guzāroñ ke sivā

baat karte haiñ vo ab aisī zabāñ meñ 'ejāz'

koī samjhe na jise nāma-nigāroñ ke sivā

wahshat-e-asar-o-sukun soz nazaron ke siwa

aur sab kuchh hai gulistan mein bahaaron ke siwa

ab na be-bak-nigahi hai na gustaKH-labi

chand sahme hue mubham se ishaaron ke siwa

saqiya koi nahin mujrim-e-mai-KHana yahan

tere kam-zarf-o-nazar baada-gusaron ke siwa

hasraten un mein abhi dafn hain insanon ki

nam kya dijiye sinon ko mazaron ke siwa

dur tak koi nahin hai shajar-e-saya-dar

chand sukhe hue peDon ki qataron ke siwa

aap kahte hain ki gulshan mein hai arzani-e-gul

apne daman mein to kuchh bhi nahin KHaron ke siwa

manzil-e-shauq mein ek ek ko diya izn-e-safar

koi bhi to na mila jada-shumaron ke siwa

zor-e-tufan to ba-har-haal hai zor-e-tufan

kis se Takraegi mauj apni kinaron ke siwa

kaun is daur ke insan ka muqaddar banta

chand aawara-o-manhus sitaron ke siwa

kitne qadmon ki KHarashon se lahu rista hai

kis ko malum hai ye rah-guzaron ke siwa

baat karte hain wo ab aisi zaban mein 'ejaz'

koi samjhe na jise nama-nigaron ke siwa